Enn Sumaòòwend uff da Dija

(Heinz Bernard)

 

Ed Lies uned Bääwel sidsen, wie so degg im Suma, òòwens vòòam Haus uff da Diija un hallen sich enn Vazeelches. Ed ganz Dorf wijad durchg´he­cheld.

„Pass uff, saaded Lies, ed iss jòò nidd daß ma iwwa äänen ridschen, ed iss jò nua, daß ma davaan schwädsen. Ed ledsch Mòòl, wie ma lòò g´sidsd hann, dòò hamma iwwamm Pidd unem Luwis sein Schallwaari g´schwädsd, dòò hamma noch g´saad: Waad mòòl, wenna nòmmòòl an d´  Droch geròòd. Dea seifd jò wien Loch, dea vadrääd enn Kuubidd voll. Am Sundaach wòòred nòmmòòl so weid, dòò hann s´ nòmmòòl enn  Bränndchin gedrääd, do wòòa usa Kulla aach dabei. Ed wòòa Hellwennaad wie s´ hem­kumm sinn, un s´ wòòaren voll wie dausend Mann. Uusa had g´koddsd wien Gerwahund, un sein G´biss issem in d´ Abdridd g´fall. Wadd hòrra am nägschden Daach vòòan Äääwed, bisad nòmmòòl funn had. D´ ganz Abdriddsgruuf harra mißden lääa machen.

Jòjò, dad iss jò nidd g´nuch mem Saufen, a schded jò dann ach jedesmòòl med seinen   Scholden am schwarzen Breed, un mija mussen uused am Maul abschbaaren. Eich schaamen mich jeedesmòòll wien Bedsaachadd, wenn eich d´ Scholden bezaalen geen.

Lòsse dòch schdeen, Scholden laafen da nidd furrd. ‑ Nää, nää, d´ wijaschd jò vagrääschd im ganzen Dorf .

A brobo Hochzeid! Da Schòrsch had doch d´ vòòrich Wuch ed Ammei g´heiradd. Dòò issed uffgang wie uff Maddsen Hoch­zeid, gischda g´heirad, haud ed Kinnd gried. Awwei hann s´ aach drei Sorden, ea hòdda via, ed drei un awwei dad Glään. Jedsd kannen s´ aach saan, mein, dein un uus Kinna. Jòò, dea Dilldabbes had doch gladd g´saad "Eich häded ach g´­heiradd, wenned kään Kinna g´had hädd." Jòò, dea iss doch so dumm wija lang:g iss, so dumm wie Schiffascheise. Dea heead un g'sidd nidd un lääfd kääna Hääjad nòò. Dea kann noch nirremòòls bis drei zeelen.Wenn dea mißd vann seina Dumhed Schdeijan bezaalen, dann gääwa gaanidd g'nuch vadienen. Dea iss sovill wääd wie uff d´ Bodden g´schbauds, dea iss hinnamm Mòònd dahemm. Jòò, so ebbes michd nua ääna, die wo kään Hieren im Kobb had. 

Dau , Bääwel, haschde schunn g´heead, beim Schauden wòòa da His:chin.‑ Wadd willn s´ dann dòò hollen? Die hann doch neischd s´ reißen un s´ beißen, bei denen gered d´ Bach runna, die grien doch kään Bään me uff d´ Bòrren. Jòò, jòò. Die sinn so aarem wien Kirchenmaus, die hann doch iwwa Naad kään Brood im Haus, bei denen laafen die Meis im Kichenschaff rimm un hann Dräänen in d´ Aauen. - Dau haschd rechd Lies. Dad bis:chin Geld wo dea vadiend, reichd hinnen un vòòa nidd, die sinn hinnen hòdd, die hann neischd am Labben, die leewen graad vann da Hand in d´ Zand. Un dòò gedd dann noch da His:chin hin, dòò gridda vil­leichd noch enn Taas bawesen Kaffee. Duu dau mòòl em naggijen Mann sein Hemd aus. Dòò finnda kään Blädds vòòa seinen Guggugg.

Bääwell, haschd dau ledschd den Kalaumes lòò g´heead, den da Schauden med seinem Nòòba, dem Jääb hòdd. ‑ Nää, awwa eich kammad deng:g´n, wadd dad vòòn Palawa wòòa, dòò sinn doch beschdimmd nòmmòòl d´ Fetzen g´floo. Med so ääm iss jo kään grad Fuua s´  faaren, med dem kimmd doch kääna s´ rechd. Dea iss imma gleich owwenwidda. Un dem Seind iss dann ach noch soon richdich Wedda­heggs, dad daaud em Deiwel am Ääasch neischd, dad kann da d´ Ang´l raushollen, dad gääwda mem blaggijen Asch inned G'sichd schbring´n. Dad iss frech wie da Dregg im Weech. Jòò, wenn d´ denen zuheeaschd, kinnsch d´ d´ Ääasch in d´ Seid grien. ‑ Wie dad so richdich loßg´leed hòdd, dòò wòòared em Deele nimme äänduun. Sunschd harred jo aach Hòòa uff da Zung, awwa lòò, lòò issed abb, wadd giffsch d´ wadd hasch d´, hinnenrimm ind Haus. ‑ Jòò, un dann will em Jääb seind imma noch ebbes Bessres sinn, grooß Firz harred im Kobb. Ed tabbd lòò rimm wie da Schdòrch im Salaad. Die gääwen gääa med d´ grooßen Hinn pissen geen, bring´n awwa med den gläänen noch nirre­mòòls ed Bään hoch.

Awwa awei mòòl ebbes ganz annaschdes, Lies. Hasch dau schunn em Glòòs sein nau Kaledsch g'sinn? Nää, awwa eich hann davaan g'heead. Die kannend jo ach gudd machen, die kannen Fedan in d´ Lufd blòòsen. Ääna wie dea heead d´ Flee nießen un ed Gras waaßen. ‑ Jòò, dòò haschde rechd. Dea iss nidd uff d´ Kobb g´fall, dea iss med allen Wassan geweschd, nua nidd med Weiwassa. Dea iss friija uffg´schdann wie mija, dea iss uff da Heeh. Dea had vann Aanfang:g aan gewuschd, daß ma vamm Schaffen nidd reich giffd. Dea had sich in'd g´machden Nischd g'sidds. Geld bei Geld, Schdigga bei Schdigga. Dea had d´ grooß Mischdenkaul g´heiradd un nidd ed graddlich Ammei.‑ Nò ja. Wea sich wääs s´ schigg´n, dea brauch sich nidd s´ bigg´n. ‑,Awwa dad muß mamm lòssen, a helld sein Sach s´sammen, a had sein Leid inna da Fuchdel, a iß soon richdija Leidsg´heia, noch schlimma, enn Leids:schdribba. Bei dem kamma aach saan „da faulschd Baua had d´ diggschd Grummbann". Dea dengd aach: „Bessan Bauch vamm gudden Essen als wien Bugg´l vamm villen Schaffen.“Awwa luu mòòl sein Daaleena aan, s´ hann kään Äsch me in da Buggs. Wemma mee Zeid hädd, dann kinnd ma s´ bedauan. Die hann d´ Baua g´freß wie d´ G´iß ed Messa. 

Jòò, un dea ald Mads, em Ammei sein Pabben, dea gridd lòòdavaan neischd me med, dea iss dodschder­wesgrang:g. Med dem gerred hinnenrunna. S´ hannen ausgedòòn bis uwed ledschd Hemd. Jòò, dea aarem Deiwel, a iss noch nirremòòls kababel vòòa allään uffed Dibbchin s´ gehn. Mein Herz im Leif hädd nidd draan g´glääfd, dassa so ebbes medmachen muß, dad iss jò nimme menschenmichlich, dem hann s´ schoofel medg´schbilld, dea iss schlechd draan, eich glaaf nidd, dassa noch lang michd. Dad iss awwa bei uus ganz annaschd, uus hammija noch kään Dauword ginn.

„Heaschde uff, du Niggudd, du Freggadd du. Kennsch d´ denen. Dad issem Lisa seina.‑ Dea issem Deiwel aus da Hòdd g´schbrung.‑ Wenn d´ awei nidd uff­heaschd, dann kimmschd d´ med Schuu un Schdrimmb in d´ Hell. Waad, eich kummen da.“ – “Haha, biss dau ausg´schiss haschd, bin eich iwwa siewen Benn.” – „Ed iss jo nidd g´nuch dassa frech iss wie da Dregg am Wech, a glaud ach noch wien Adsel. ‑ Jeds iss awwa zabbenduschda, eich glaaw dija bliid ball ebbes.“ – „Dau kanschd ma d´ Bugg´l ruffrudschen.“ – „Wenn eich dich nòmmòòl schdeeren muß, dann haschde dich g´ledad. Dad issen abgaschdija Kerl, eich kann den nidd vagnuusen, eich kinnden drung:g´n un dirmmlich schleen. ‑ Zum Dunnakiddel nommòòl. Dann soll dich doch gleich da Haalegga hollen. Dea iss doch nimme ganz juschd, eich glaaw dau bischd vamm Lemes g´biß. Wenn da Mads dich in d´ Finga gried, dann bischde varadsd wie da Grabskaara, dann haschde d´ ledschden Furz g´lòß. ‑ Dea wääa jo nidd so, wenn sem vann dahemm aus nidd gääwen d´ Schdang hallen. ‑ No ja, da Abbel felld nidd weid vamm Biiren­baam. Godd sei Dang:g, a iss perre gang.

Bääwell, dau haschd jo noch ganneischd vann auam Imms vazeeld. 0o, a:inna mich nidd dran. Bei d´ määschden wòòaren d´ Aauen greeßa wie da Bauch. Die hòrren sich all g'saad : “Weil mad nidd brauch s´ bezaalen, wijad ach alles geß.” Mija wòòa­ren schunn all ferdich, dòò haddem Piddchin seina sich nòmmòòl g´schebbd un had gedeng:gd: „Wea nidd will dea had g´freß". Die hädden uus d´ Hòòa vamm Kobb g´freß, die hann dring´schlaa, als wenn s´ schunn achd Daa neischd me gried hädden. Die hann geß bis kään Gnedel me im Dibben wòòa, die hann d´ Bladd g´budsd. Die hann d´  Hals nidd vollgried, die hann nimme geß, die hann g´freß, daß s´ nimme gwaag´n kunden. Da Piddchin hòrren Timmel voll uff seim Tella, dòò hädsch d´ kinnden mem Ulaannenpeead driwwaschbring´n.Wijan halwa geß hòdd, dòò wollda uffheeren. Dòò saad sein Mammen: “Lòò wiad blief . Dea Tella wijad radsebuds lääag´mach.“ Die Alden hann g´suff wie d´ Lecha.- „Dea Sellwag´branden lòò, dea duud da neischd,“ harred imma g´hääschd, „dea iss gudd vòòa d´ Vadaaung.“ In da Schduff hann s´ Dullen g´schbilld un d´ Lufd vapeschd med ijarem Sangd Wendla, den s´ in ihrem Gloowen geraauchd hann. Ed wòòa Hellwennaad wie s´ hemgang sinn, un d´ määschden wòòaren voll wie d´ Schrandhaubidsen.

Aach luu mòòl lòò, lòò kimmd mein Engelchin, uus Ammeichin. Iss dad nidd enn goldich Ding´lchin? Dad hängd mia imma am Benndell. Dad sollschd dau mòòl g'sinn danzen,dad drääd sich wien Dilldobb un singd wien Läärchin. Jòò, ännd iss vòòa dem annan, dòò schdichschde nidd drinn. ‑ Eich muß awwei rinn, dad kimmd mich rufen vòòa s´ Naad s´ essen.

Also Bääwel, hall dich kurrasch! Jòò Lies, hall dich munda!