22. Da Hahn giffd g` fong:g
(Heinz Bernard)
De Hawwa- unn de Gerschdkaschden horren enn Middelgarf, siwwen Mandelgarwen unn drei Huudgarwen. Ään scheena alda Brauch vann doomools iß noch se awäänwn: Wenn de Määja ball ferdich wooren unn edd Enn se g´sinn wo:a, dann iß en Garf medd Bännann g´schmiggd unn uwemm Schdeggen feschdg´mach wo:ad. Die iß jedsd inn da Midd vann deem ledschden Schdigg uffg´schdelld wo:ad, unn die Määja durfden vann allen Seiden uff den Schdeggen loßmääjen. Deja woo dae:aschd draan wo:a, deja harren aus emm Bodden g´zoo unn hadd g´ruuf: „Eich hann de Haan g´fong:g.“ All woo umm Schdigg wooren hann g´sung unn g´danzd unn wooren froo. Jee noo Widdrung hann dann die Ko:akaschden enn pa Daa umm Schdobbelfeld g´schdann fo:a aus:s´druggen. Dann sinn se inng´faa wo:ad. Dissmool hadd da Hanne de Läädawaan merem großen Duuch b´schbannd, daß ma nidd soo vill Kää:aren valli:ad. Da Niggel hadd g´gawweld, da Hanne de Waan g´laad. Dae:aschd da Kaschden zwischen deen Läädann unn dann die anna Garwen, imma medd de Ää:aren inn de Waan rinn. Edd Maria unn edd Anna sinn hinnennoo gang unn hann die Ää:aren, die woo lein bliif sinn uffg´rechd, haubdsächlich an deen Schdellen woo de Kaschden g´schdann horren. Inn da Scheija dahemm iß dann da Waan direggd abg´laad wo:ad. Die e:aschd zwoo Garwen, die woo uff de Dääß g´gawweld wo:ad sinn hadd da Hanne kreizweis iwannanna g´leed unn inn jeed enn Graudwisch g´schdoch. Die ledschd Garf medd deen farwijen Bännann harra inn de Eggen g´schdelld. Dadd wo:a die Garf , die woo ann Grischdaach inn de Gaaden g´schdelld wi:ad vo:a de Vijel. Wennedd vo:a se gawweln se hoch wo:ad iß, dann sinnn de Garwen memm Rollsääl hochg´zoo wo:ad.
Heinz Bernard
